అక్షర వ్యథ

                           అక్షర వ్యథ 

             గుండు సున్నాలో పుట్టా                   నిండు పున్నమిలా ఎదిగా 

             గుండె నిండా సవ్వడిని                      మనసు నిండిన ఊహలను 

             సునిశితంగా విస్పష్టంగా                    వెలిబుచ్చడానికి వెలువరించడానికి 

            విధేయంగా వినమ్రంగా                       ఎభైయ్యారు అవతారాలెత్తా. 

            వాక్ప్రవాహంలో వరదనై వెల్లువై           ఉరకలేస్తుంటే గోదావరొడ్డున 

            రాణ్మహేన్ద్రిలో కోటిలింగాల రేవులో        అవభ్రుధ స్నానం చేయించాడా నన్నయ్య 

            ఆతరువాత తంజపురిలో కొన్నాళ్ళకు   ఏవనితల్ మముం దలుప నేమిపనో 

            అంటూ నిలదీసే ధైర్యాన్నిచ్చి                ముందుకొచ్చింది . 

            పద్యమై హృద్యమై గద్యమై కావ్యమై      కమనీయ  సాహిత్యమై శ్రావ్యమై 

            రసరమ్య గీతమై ఎదిగిన                      ఆంద్ర  భారతికి 

            చెంగావి రంగు సరిగంచు                      చీరలా భాసిల్లా

            నెన్నుదుట కుంకుమ బొట్టునై              ప్రకాసించా. 

            ఇప్పటి ఈ నాయకమ్మన్యుల్లా కాదు       తంజపురి నాయక రాజులు 

            బంగారు కామాక్షి సాక్షిగా సరస్వతీ         మహలులో అగ్రాసనం వేసారు. 

            శ్రీకాకుళాంధ్ర దేవుని ఆనగా                  సాహితీ సార్వభౌముడు 

            విజయ నగర కృష్ణ దేవ రాయలు           అముక్త మాల్యదలల్లాడు

            అష్ట దిగ్గజాలతో భువన విజయం            చిరస్మరణీయంగా అందించాడు . 

           కడపనే నాకొక గడపగా చేసి                  తాటాకుల ఇబ్బందుల తాళలేక 

           కాగితాలపై అచ్చొత్తించాడా బ్రౌన్దొర           అచ్చతెలుగు బిడ్డలా. 

           ఇంతలో 

           కాకెత్తుకు పోయిందో ఏమైందో                కనబడకుండా పోయింది 

           వెలపల గిలక                                       ఓ రామచిలక. 

           దంత్య చజలు పలుకలేక                      చప్పరించేసాడొకడు 

           ఆలు అలూ లను గుప్తంగా                    లుప్తం చేసాడింకొకడు. 

           ఋఋఱలను నోరారా పలుకలేక           చేతులారా తిప్పలేక 

           గోదాట్లో పారేసాడో  పారేసాడో                  సత్తెకాలపు సత్తిగాడు. 

           ఇప్పుడు 

          ఓ వంకరి టింకరి 'ఓ' గాడి                      ఏ బీ సీ దాడికి అల్లల్లాడుతున్నా 

          ళ శ లను మింగేస్తాడేమో                       ముదనష్టపు ముష్టిగాడు . 

          అయినా 

          నిమ్మళంగా సమ్మాళి0చుకు                   విరుచుకు పడతా విజృమ్భిస్తా 

          నాగమల్లెలా నాజూకుగా కనిపిస్తూ            తీగామల్లెలా లేలేతగా విరబూస్తూ. 

             

             

                               

బ్రతుకమను భారతీయుడై

                          బ్రతుకమను భారతీయుడై 

                   సీ.  ప్రతిఘటించవదేమిరా  ఉదాసీనుడా 

                                             నీ మతాన్ని  తిడితే నిబ్బరంగా 

                         తిరుగబడ  వదేమిరా ఓరి హైందవా

                                             దైవాన్ని దూషించు దైత్యు పైన 

                         గూబ పగుల గొట్టి గొంతు నొక్కేయరా 

                                            మత సామరస్యాన్ని మరచు వాని 

                         కాదన్న పోమ్మనరా హిందు దేశము 

                                             వీడి వేరెచటకో  విర్ర వీగ 

             తే. గీ.  తగదురా ఇంతటి ఉపేక్ష తప్పు నీకు

                       వద్దు ఊరుకోవద్దు ఉవ్వెత్తు కెరట 

                       మై  ఎగసి ఉప్పెనై లేచి  మెడలు వంచి 

                       బ్రతుక మను భారతీయుడై  బ్రతుక నిచట. 

ఈ పద్యం ఒక మతోన్మాది హిందూ మతాన్ని ద్వేషిస్తూ దూషిస్తూ ఉపన్యాసాలు ఇచ్చినప్పుడు గరికిపాటి నరసింహారావు గారి బ్లాగులో ప్రతి స్పందనగా వ్రాసినది. కాని ఆ రోజు నేరుగా వ్రాయుట వలన ఆంగ్ల లిపి లోనే 

ఇవ్వ గలిగాను. 

ఈ రోజు ఒక కౌసల్య గారు దాన్ని మెచ్చుకున్నారు గాన తెలుగు లిపిలో ఇస్తున్నా.   

                                             

తీపి జ్ఞాపకాలు

                                    తీపి జ్ఞాపకాలు 

                     ఏటి ఒడ్డున చూడ చక్కని ఓ కోవెల 

                     పంట చేల పచ్చని పరదాల ఆవల 

                     కుహు కుహూ రాగాలతో మరో కోవెల 

                     రామ చక్కని సుస్వరాల జంపాల 

                     అట తోపులో

                     హాయిగొలిపే మఱ్ఱి ఊడల ఉయ్యాల

                     ప్రకృతి ఒడిలో బ్రతుకు ఉయ్యాలా --జంపాలా. 

                     సూరీడు అలసిపోయి  ముసుగేసే సందేళ 

                     ఆవంక ఆయేటి నీటి గలగలలు 

                     ఈవంక గుడి గంట గణగణలు 

                     గూటికి చేరే పక్షుల కిలకిలలు 

                     గో ధూళితో మసక చీకటులు 

                     పల్లె గడపలో దిద్దినా ఓనమాలు 

                    జొన్న కంకులు  గంటి వెన్నులు 

                    తాటి తేగలు  లేగదూడలు 

                    నాకు నచ్చిన నేస్తాలు  

                    నేత్తన రాళ్ళు   పిచ్చుక గూళ్ళు  

                    తొక్కుడు బిళ్ళ గోటే బిళ్ళ ఆటలు 

                    మధ్యలో ఆటలో అరటి పళ్ళు 

                    అప్పుడప్పుడూ కాకి ఎంగిళ్ళు 

                    ముక్కాలి పీటలు ముసలమ్మ కేకలు 

                    నీలాటి రేవులో ఆడపిల్లల ఎకసెక్కాలు 

                    తుణకాలు చక్కిలాలు జంతికలు 

                    తలచుకొంటే ఎన్నెన్నో తీపి జ్ఞాపకాలు 

                    నా మనసు నిండా కోకొల్లలు 

  

ఉగాది శుభాకాంక్షలు

                             ఉగాది శుభాకాంక్షలు 

          ఆ  నందనందనుండానంద నందనా 

                           న   సకల జనుల మనసులెరిగియు 

         ప్రారబ్ద వశమంచు కర్మ క్షయమటంచు 

                            కడగండ్ల  కన్నీళ్ళ కనల నిచ్చి 

         ఇంక పునీతులైరి జనులని తలంచి 

                            కామితార్ధము లిచ్చి కావదలచి 

        విజయమ్ము  మీ ముంగిట నిరతమ్ము నిలుప 

                            'విజయ' వత్సర మంపె విశ్వ సింప 

              జయము జయమని దీవించు జనుల మరల 

              ధర్మ మెరిగిన వారికాధార మగుచు 

              సర్వ సౌభాగ్యములు మీ కొ సగు యుగాది 

              ఈశ్వరేచ్చగా శుభప్రద మీ యుగాది. 

నందన వత్సరానికి వీడ్కోలు పలుకుతూ  విజయ నామ వత్సరాన్ని స్వాగతిస్తూ ఆపైన  ఇంకా 'జయ'

నామ  వత్సరాన్ని ఊహించు కుంటూ  ఆ వత్సరమూ   శుభప్రదము కావాలని ఆకాంక్షిస్తూ అందరికీ 

శుభాకాంక్షలు. 

వలస కూలీ

                    వలస కూలీ 

                  నేనొక  అలుపెరుగని  వలసకూలీ 

                  నామీద మీకెందుకంత  జాలి 

                  అత్యాశ కావచ్చు  ఆరాటమే కావచ్చు 

                  నా ఊహ ముమ్మాటికీ తప్పు కావచ్చు 

                  దూరాన మేలనుకొని బీడు లో ఆబగా 

                  ముందుకు పోయే పశువు లాంటివి

                  నామనసు ఆశ ఊహ కావచ్చు 

                 ఉన్న ఊరును కన్నవారినీ విడచి 

                 మేలాశతో పొరుగు వాకిట పనికి నే నడచి 

                 రేబవలు అలుపెరుగక పని జేసినా (ను )

                 ఎలాగో రూకలు నాలుగు వెనకేసినా (ను )

                 ఎన్ని వ్యధలు ఎన్ని కధలు ఇంకెన్ని బాధలు 

                 నా గుండెను పిండేసాయో తెలుసా 

                 అయిన వారికి అందక కానకళ్ళను బ్రతుక 

                 వేదనలు  వేడుకలు  పండుగలు  సందడులు 

                 ఎన్నిటినో వదులుకొని అన్నిటికీ సర్దుకుని
                 రానిదానికి ఆగ్రహించినా లేనివాడని ఈసడించినా
                 అపసవ్యంగా నోరుమూసుకున్నా
                 హతోస్మి అని చెవులు మూసుకున్నా
                 ఆ అపహాస్యాలూ అవహేళనలూ
                 నా నిట్టూర్పు సెగలో బూడిదైనై
                 ఓ వేడి కన్నీటి బిందువై దిగాజారినై.

                నూతిలో కప్పలా బ్రతక లేక
                అద్దాల పెట్టెలో చేపలా ఇమడలేక
                రాగి పంచపాత్ర చేతబుచ్చుకుని
                సంప్రదాయాల్ని చంకబెట్టుకొని
                బ్రతుకు తెరువున పయనమయ్యా
                దవ్వులెన్ని చేరినా నవ్వులపాలు కాలే.

                రాటుదేలిన బ్రతుకు నాది
                చేవ తీరిన పలుకు నాది
                ముల్లు నాటిన గుండె మూల్గుల
                వెల్లువెత్తిన వేదనల మాటున
                ఏ పనికి నే జేరినా
                పూర్తిగా న్యాయమే జేసినా.