అంతా భ్రాంతి యేనా?

వందల పిల్లల నడుమ ఏకాకి జీవితం నాది
అందరూ నావారే కాని అనాథ బ్రతుకే నాది
ఒకరు  అభిమాన పుత్రిక మరొకరు  ప్రియవాది
అయినా నా కుశలం అడిగే వారేరీ కోరే వారేరీ
ఉభయ సంధ్యలా అర్చించే అమ్మకైనా దయరాదా
ఉబయ తారకంగా మమ్ముల మనుమని అనలేదా
ఒంటరితనం నను వెంటాడు తూంది
ఇంటి వాతావరణం ఇంకా ఎప్పుడొస్తుంది
నా బాల మా నట్టింట కదలాడే దారే లేదా
అనునయంగా ఆప్యాయంగా పలికేదే లేదా
మా ఇంటి తనయగా మా కంటి  పాపగా
మాతో కలిసేనా అంతా భ్రాంతి యేనా

అమ్మ కు అమ్మలమ్మకు  సువాసిను లందరి కమ్మకున్ సదా
సొమ్ముల  యమ్మయున్ సరస సాక్షర భారతి సేవజేయు మా
యమ్మకు విశ్వ మాతకు దయాంబు నిధీ లలితాంబకున్ మదిన్

1. కొమ్మని నాదు పూజలను కోరుచు నాత్మ తలంతు నెప్పుడున్.

లక్ష్యం

నిండు నూరేళ్ళూ బ్రతుకాలని ఆశించుదాం
బ్రతికినన్నాళ్ళూ ఉన్నంతలో కొంత పంచుదాం
పరోపకారం మన ప్రవృత్తిగా మలచుకుందాం
మంచిని పెంచుకుందాం పంచుకుందాం
ఈశావాస్య మిదగం సర్వం అనే నమ్మికతో
కర్మణ్యేవాధికారస్తే అని కర్మల నాచరిద్దాం
నాతి చరామి మన మౌలిక నియమంగా
సంపదని సృష్టించుతూ పంచి ఇద్దాం
మన సహాయ సహకారంతో కొందరైనా
తమ జీవితాలను ఉన్నత స్థాయికి
చేర్చు కోవాలి ఆ పద్ధతి నేర్చుకోవాలి
అదే మన జీవన గమనం కావాలి
ఈ లక్ష్య సాధనలో ' నేను సైతం 'గా కదలాలి
నా దేశం అగ్రగామిగా నిలవాలి
మన దేశం ఎందరికో మార్గదర్శి కావాలి

శ్రేయో గామి

నా మానస వినీల గగనంలో
నీ వొక సిత శీతశరద్జ్యోత్స్నవు
నా గతుకుల బ్రతుకు ఎడారిలో
నీ వొక వక్రగమనాశక్త జాహ్నవివి
నా దొక నిరంతర భగీరథ యత్నం
నీ దొక వింత పోకడల మనస్తత్వం
బాలవై బేలవై అంబికవై చుంబికమై
నా జప తపస్సమాథిలో సుషిప్తిలో
కట్టెదుట కదలాడే భాగీరథివి నీవు
జాగ్రదవస్తలో ఏకాంతంలో మనోజాతవు
ఈ అనుబంధానికి విలువల జోడింపు
నా అనునిత్య ఆరాట పోరాట మేళవింపు
పర్యవశానం ప్రాప్తా ప్రాప్తం ప్రారబ్ద పూరకం
ఆశ నాది నిరాశక్త త నీది
లక్ష్యం నాది నిర్లక్ష్యం నీది
సంస్కృతి నాది సంపద నీది
యత్నం నాది ఫలితం నీది
నా చేతులతో నా చేతలతో
భవిత తీర్చి దిద్దాలి
బ్రతుకు బాగు కోరాలి.

ఎవరు నీవు

రేయెండ దిగులులో బలే బలే మురిసావు

నీరెండ యెలుగులో నిగా నిగా మెరిసేవు

సోకులకే నీవు తలదిరిగే సోకులమ్మివే

కులుకులకే నీవు మతిపోయే కూనలమ్మవే

ఇంతకీ

అల్లసాని వారి పిల్ల వరూధినివా

విశ్వనాథ వారి ప్రౌఢ కిన్నెర సానివా

నండూరి వారి పాలకంకి ఎంకివా

మావూరి ఉరుకుల్ల పరుగుల్ల గోదారివా //   //

బమ్మెర వారి కోమల కావ్య కన్యవా
తిమ్మన గారి అలుకల సత్య భామవా
ముద్దు పళని ముద్దు గుమ్మ రాధికవా
కూచిపూడి భాగవతుల కూనలమ్మవా //   //

మ. ధ్వాంతారాతి పయోధి పై ఉదయ సంధ్యా వెల్గు లీనన్  జగ
ద్భ్రాంతిన్ వీడి తిథిప్రణీ కలిత రేరాణిన్ ప్రమోదంబుతో
శాంతిన్ బొంది సుషుప్తి కిన్ దగుల విశ్వాసంబు తో ప్రీతితో
అంతర్యామిని కొల్వగా వలదె నిర్ద్వంద్వంబుగన్ నిష్ఠతోన్.

నేనొక అభిసారిక

నభో నవలామణీ నెన్నుదుట రక్త తిలకమై
ప్రాచీ నభస గర్భోదయ అరుణ బింబమై
తొలి పొద్దు వెలుగులో  ఎదురు చూసి చూసి
ప్రాచీ వీచికనై వీచీ బాలికనై బాలానందమై
ఎంత చూసినా తనివి తీరని ఆర్తి నాదై
ఆ మధుర క్షణాల కోసం ఎదురు చూసే
గడ్డి బరక పై మంచు బిందువు నేనై
హిందోళ రాగాలాపననై స్వర జతినై
జగతికి మేలుకొలపులు పలికే
కుక్కుటమై వాయసమై కేరింతల పుడమినై
కలలు కనడమే నా కిష్టం కానీ సంక్లిష్టం
ఆ కలలో నాకనులలో  ప్రకృతిలో
మనసారా పరవసించడమే నాకిష్టం.

శా. మాతా హైమవతీ సదా శుభకరీ మాతంగ కన్యాం ఉమామ్
ప్రాతఃమన్మనసా స్మరామి జననీమ్ ప్రాజ్ఞీమ్ భవానీమ్ శివే
శాంతాకార విలోచనీమ్ సతత మీశానీమ్ విశాలాక్షి త్వం
ధ్వాంతారాతి శశాంక నేత్రి తరుణీమ్ వందే శివానీమ్ సదా.