ఊడిగం
గుర్తింపు లేని ఊడిగం
గుదిబండ లాంటి పాతకం
ఎదురేగి ఎద పఱచి పిలిచినా
ఏమార్చి నిట్టూర్చి నిను వీడిపోతే
ఇంకా కాళ్ళు పట్టుకు వ్రేలాడటానికి
ఏమిటీ ప్రారబ్దం ఎందుకీ బానిసత్వం
గౌరవం మర్యాద భయం భక్తి విలువ
విశ్వాసం ప్రేమ అభిమానం మమకారం
ఏదీలేని కఠిన పాషాణ హృదయం
విధిలేక గతిలేక మతిలేక
చేసే ఉపాస్తి
లోకువ బ్రతుకుల తేకువ గాని
అస్థి నాస్తి విచికిత్సాలేమి లేమి కాదె
అహం త్వం న విలోచనా గరిమ గరిమ యౌనె
నిశ్శబ్ద సంగీత నివహపు నిశీధిలో
శూన్యచంద్రికా తిమిరచ్ఛ టా పరిష్వంగ
దుర్దశా దుర్నిరీక్ష్య దుర్విధి దుందుడుకులా
నామది నిండా ఏవేవో ప్రశ్నలు
నా ఎద నిండా వేనవేల సంశయాలు
నా కళ్ళరెంట అశృబిందువులు
నా కలల పంట కృష్ణార్పణం
నా గుండెనిండా వాయుగుండం
వాతావరణం చక్కబడేనా
అనుకూల పవనాలు వీచేనా
ప్రశాంతంగా సుషుప్తిలోకి జారేనా?
(ఉపాస్తి= సేవ, తేకువ=భయము, నివహము=గుమి)

ఎంత కాదనుకున్నా మనసంతా నీవే
ఎంత వలదనుకున్నా తలపులన్నీ నీవే
పలుకే బంగారమైనా ప్లాటినమైనా
నీవే నా కళ్ళకు ఓ బంగారం
నీవే నా మట్టుకు ఓ బాలానందం
ఎన్ని జన్మల ఋణానుబంధమో
నిన్ వదలి నే నుండ లేను
నన్ మఱచి నీ వుండ లేవు
అంతరాలు ఎన్ని ఉన్నా
ఆంతర్యాలు ఒకటే కన్నా
ఉలి దెబ్బలతో తీర్చి దిద్దాలి అపురూపంగా
కొలిమిలో కాల్చినా నిలవాలి సగర్వంగా
ఉన్నత శిఖరాలను అధిరోహించాలి
నా మనోజాతగా పేరు నిలపాలి
అహరహం పరిశ్రమించాలి
అనుక్షణం అనుకరించాలి
ప్రతి ఉదయం ఉపక్రమించాలి
ప్రతి రాత్రీ ప్రశాంతంగా నిదరోవాలి.

గంగవై తరంగవై శివుని శిరమెక్కి ఉంటావా
గౌరివై అర్థాంగివై ఎడమ ప్రక్క నుంటావా
కల్మష నాశినివై దివిజ భాగీరథివై
ఉత్తుంగ తరంగమై శివుని శిరమందుందువా
సనాతనులై ఆది దంపతులై జగజ్జనకులై
విడరాని బంధమై అర్థ నారీశ్వరమై నీ వుండవా
పతిత పావని గంగ పరమ పావని గౌరీ
వక్ర గమనపు గంగ ఋజువర్తనపు గౌరి
గంగలో మునక జన్మజన్మల సుకృతం
గౌరీ పాద సేవ పరమ భాగవతుల స్వంతం

ఎందుకంత వ్యామోహం

నీ కెందుకంత మమకారం
ఏమిటా సమ్మోహనం
ఎందుకా అనురాగ రాగం
నీ మృదు లాలస గళ నిగళం
సప్తస్వర ఝరీ తరంగం
అవధులెరుగని అభిమానం
ఆ మంత్ర ముగ్ధ మనోహరం
నీ కెంతో అపురూప రూపం
బాలా త్రిపుర సుందరీ ప్రతిరూపం.

తదేక దీక్షతో ఏకాగ్రతతో సాధించేది లక్ష్యం
తపన సాధన సమిష్టి కృషి తో అది సుసాధ్యం
దురాశ దుర్నీతి వెన్నుపోటులే అవరోధం
ఒంటరిగా సాధించడం ఎవరికైనా అసాధ్యం
లక్ష్య సాధనకు త్యాగ నిరతులే సోపానం
పెట్టుబడి పెత్తనం జవాబుదారీతనం
అన్నీ కలసివుంటేనే యాజమాన్యం
లేకుంటే సొమ్మోకరిది సోకు ఇంకకరిదీ
ఓర్పు నేర్పు కలుపుగోలుతనం
భాగస్వామ్యానికి ఎంతో ఆవశ్యకం
ఋణమిచ్చే ప్రపంచ బాంకు కూడా
సవా లక్ష షరతులు విధిస్తుంది
ఇచ్చిన మాటకు కట్టుబడితే పరపతి
తుంగలో తొక్కితే బోడి గుండు తిరుపతి
అక్కసు ఉంటే చేసుకోవలసినది ఏకస్వామ్యం
కలసి నడవలేని వారికి ఎందుకు భాగస్వామ్యం?

       ఎవ్వరి కోసం

   ఎవ్వరి కోసమై తనిసి ఎగ్గులు సైచి మనో వికల్పమందినీ

   వెవ్వరి మేలుకై పరితపించితివో కలగంటివో శ్రమం
   బెవ్వరి కోసమై పడితి వెవ్వరి యున్నతి లక్ష్యమై సదా
   ఎవ్విధి ప్రాకులాడితివొ ఏ లవ లేశమైన జాలి చూపిరే
   నవ్విన వారు నవ్వు కొన నిమ్మని నీవొక యోగివై మనో
   క్రొవ్విరి పూత పూసినటు క్రొత్త విలాస విహారివై మనో
   సవ్వడి నేర్పి నట్టి మొగశాలను రంగుల రంగవల్లులన్
   ఎవ్విధి తీర్చి దిద్దితివి ఏరిట వారొక రేని తోడుగా
   ఎవ్వరి కైన జాలి గలదే ఎదలోన నొకింత ప్రేమ తో   ఎవ్వరి కంట? కంట నొక వేడి దయార్ద్ర పు బిందువేని నీ
   మువ్వపు కాంచనాబ్జముల ముద్దుల యమ్మలు కైన ని
   న్నెవ్వరు తల్తురీ దరిని ఎవ్వరు నిల్తురు నంత నీదరిన్
   దవ్వుల దూరదేశముల దారిన నీపయ నంబటంచు న
   న్నెవ్వరు ఈసడింప వల దేను నిజోత్పన్న జన్య భావనా
   గువ్వపు ప్రోది కోసరము గూఢముగా పరికించు చుండగా
ఇవ్వల నీ విరోధములు ఈర్ష్య నసూయలు మీకు ధర్మమే.
 
 
   
 
 
 

ఎందుకంత అహం

రాగద్వేషాలూ ఈర్ష్యా అసూయలూ కోపాలు
చీమూ నెత్తురూ ఉన్న ప్రతి వారికి అనువంశికాలు
అనుబంధ బాంధవ్యాలు అవో రకం ఋణాలు
ఊపిరి ఉన్నంత వఱకే ఈ కుమ్ములాటలు
ఎగశ్వాసలో కొన ఊపిరిలో పశ్చాత్తాపాలు
ప్రాయశ్చిత్తాలు వ్యవధి  లేని మనో వికాసాలు
నలుగురితో కలసి మెలసి నడువలేని వారు
మందిలో మనలేరు అహంకు బందీలు వారు
అంతా నేనే అన్నీ నేనే అహం బ్రహ్మాస్మి అనుకోవాలన్నా
ఎంతో ఓర్మితో కూర్మితో సాధన చేయాలి కదరన్నా
నిలువునా నిలబడ్డానికి ఒంట్లో సత్తువ లేకున్నా
స్వర్గానికి ఎగిరేస్తానంటే ఒంటి చేత్తో పనిచేస్తానంటే
కాలమే తగు రీతిగా బదులిస్తుంది
మౌనమే మంత్రమై పని చేస్తుంది
విఱ్ఱవీగినా బిఱ్ఱ బిగిసినా కుఱ్ఱతనం కాబోదు
అవనత వదనం అనవరత విషాదం
శాశ్వత బహుమానాలుగా మిగిలి పోతాయి
సుస్థిర ప్రయాసలై కట్టెదుట నిలచి పోతాయి
సత్యం ధర్మం ఎప్పటికైనా గెలిచి తీరుతాయి
లోకం కళ్ళు అన్యాయం గా మూయ గలిగినా
చిత్ర గుప్తుని చిట్ఠా లెఖ్ఖ తప్పదు
సమవర్తి శిక్షకు గురికాక తప్పదు.