దేశం కోసం బ్రతకండి 

ఈ నేలపై పుట్టి ఒక రూపం దిద్దుకుని 
ఈ పైర గాలితో ఊపిరిలూదుకుని
ఇక్కడ నీటితో గొంతు తడుపుకుంటూ
ఇక్కడి వేడి వెలుతురుతో ఎదుగుతూ
ఈ ఆకసం క్రింద పండిన గింజలే తింటూ
ఈ గురుకులాల్లో విద్యాలయాల్లో చదువుతూ
బ్రతుకు తెరువుకు భారత గెడ్డ పై
మనసంతా విద్వేషంతో, విధ్వంసంతో
దురాలోచనే గాని
దూరాలోచనలేని కుంకల్లారా
నివురుగప్పిన నిప్పులా
కాదు కాదు
 గోముఖ వ్యాఘ్రాల్లా
కాలకూట విష జ్వాలల్లా
రంకెలేసే జాతి చీడపురుగుల్లారా
వాక్స్వాతంత్ర్యం కాదు మీది
దేశ సార్వభౌమ ధిక్కారం
దేశ ద్రోహం జాతి విద్రోహం
మీ స్వర్ణ సంకల్పం .
ఏనాటికీ మీ కల నెరవేరదు
మీ చిత్త  చాంచల్యం తప్ప
ఏడు  ఊసల లెక్కే మీకు మిగిలేది
నల్లగుడ్డ ముసుగే మీకు తగిలేది
దేశాన్ని ప్రేమించడం నేర్చుకోండి
శత్రువు కోసం కాదు 
దేశం కోసం బ్రతకండి
దేశం అంటే మనమే అని తెలియండి. 


 

  తెలుగు ప్రవాశీ 

ఎక్కడో నా తెలుగు పుడమి తల్లి 

ఎక్కడో నా తాత ముత్తాతల నేల
ఎంతెంత దూరాల తీరాలో 

నా కైతే ఎరుకలేదు 

తెలుసుకొనే వైనం లేదు. 

ఖండాంతరాల లో దేశంతరాలలో 

శ్రీ లంక, బంగ్లా దేశ్, అండమాన్ నికోబార్ 

మయన్మార్, సింగపూర్, ఒకటేమిటి 

భూగోళ0 ప్రతి  చోటా, ప్రతి మూలా  

కొన్ని తరాల వెనుక వలస బోయిన 

పూర్వీకుల వంశాంకురాన్ని 

అమ్మ భాష పై మమకారం చంపుకోలేక 

అమ్మ భాష నేర్పించే బడులు  లేక 

అమ్మా నాన్నలే గురువులుగా 

మా కొద్దీ నేర్చుకున్న తెలుగు నాది 

మాకొద్దు ఈ ప్రవాశం 

మాకు లేదా అట ప్రవేశం 

మమ్మల్నీ మీలో వారంగా 

అక్కున చేర్చు కునే పుణ్యాత్ములు లేరా 

'లేరే మ్రొక్కెద దిక్కు మాలిన మోరాలింపన్'

రెక్కలు కట్టుకు వాలాలని ఉంది 

నా తెలుగు నేల చూడాలని ఉంది 

నిండా తెలుగు మాటాడే వారితో గడపాలని ఉంది 

తెలుగింటి తలవాకిటిలో తల వాల్చాలని ఉంది 

మా ఊరు ఎలా ఉంటుందో ఊహల కందనిది 

మా బంధువులు, మా గురుపరంపరలు
ఇంకా ఎందరినో 

తనివి తీరా చూడాలని ఉంది 

ఓ తెలుగు సోదరా 

ఆపన్న హస్తం చాపేవా 

అప్పన్న దర్సనం చూపేవా 

మీ ప్రభుత ,మీ ఘనత ఏకమై 

మమ్ము మీ తీరాలకు కొని పొండి 

ఇదే అందరి తరపునా నా వేడికోలు 

ఆదరిస్తే అదే మాకు పదివేలు.