ఏరు వరదలా పొంగి ముంచెత్తి యుండ
ఏటి వొడ్డున కడవతో ఎంతసేపు
నిలచి నీవుందువే యట్లు నీల వేణి
ఎంత ఒయ్యారమే నీకు యెంకిపిల్ల.
చలమలన్నియు పోయెనే చపలచిత్త
ఇండుగను వెట్టి యీనీట నింక గొనుము
సుడులు తిరిగెడు నీరు నీ చూపులల్లె
ఎంత ఒయ్యారమే నీకు యెంకిపిల్ల.
భోగలింగేశ్వరుడు నీకు భోగమిచ్చె
సర్వమంగళ నీకు సంసారమిడదె
చంక కడవెత్తు కోవేల చక్రవదన
ఎంత ఒయ్యారమే నీకు యెంకిపిల్ల.
తాండవ నదితో పయనంపు తమకమేల
యేటి ఒడ్డున యేకాంతమేల? మేల?
కదలు మిటమాని దురుసు బింకాలు మాని
ఎంత ఒయ్యారమే నీకు యెంకిపిల్ల.
సరస సల్లాపములతో నీ సంగడి గుమి
మిగుల చతురోక్తులలొ మీకు మీరె సాటి
గరువమెక్కువ నీకు ఓ గవర పిల్ల
ఎంత ఒయ్యారమే నీకు యెంకిపిల్ల.
సోగ కన్నుల సొగసరీ సోకు చాలు
బెట్టు చేయకు మింక యెబ్బెట్టు గాను
తనివి తీరునే కన్నుల తమకముడుగ
ఎంత ఒయ్యారమే నీకు యెంకిపిల్ల.
ఇచట నీలాటి రేవులో యింత తడవు
ఒంటిగా నీలాటి వారుంట ఒప్పదెపుడు
తోడుగా రానటే ప్రమోదోపహారి
ఎంత ఒయ్యారమే నీకు యెంకిపిల్ల.
చదువు సంధ్యలలో కలిసాము మనము
చనువుతో చెలిమితొ చెప్ప సాహసింప
యన్యథా యనుకోకు కయ్యాల మారి
ఎంత ఒయ్యారమే నీకు యెంకిపిల్ల.