ఓటమి

       ఓటమి

నే నోడిపోయాను

నేలతల్లి ఒడలిపై ప్రాకుతూ

కేరింతలతో ప్రాకులాడుతూ

ఉండలేక జీవితం అదే అనుకోలేక

ఓడిపోయాను.

 ఓడిపోయి మరెప్పుడూ ఆ జోలికి పోలేదు,

ఉయ్యాలలో పడుక్కుని

ఆ మూరెడు యెడంలో ఉన్నదే విశ్వం అనుకుని

అలా పడుండలేక ఓడిపోయాను

మరెప్పుడూ దాని జోలికి పోలేదు.

అమ్మా నాన్నల మధ్య

తప్పటడుగులతో తడబడుతూ

తకిటతధిమి తకిటతధిమి తంధాన అనుకోలేక

నరుని బ్రతుకు నటన అని తెలుసుకోలేక

ఓడిపోయాను. తప్పెటగుళ్ళు తప్పటడుగులు వదిలేసా.

పితరులు చెప్పిన కృష్ణశతకం

అమ్మ పాడే కృష్ణుని పాటలూ 

శ్రుతపాండిత్యంగా ఒడిసి పట్టినా

అందులో ఎందుకో ఓడిపోయాను.

చదవడం వ్రాయడం నేర్వాలనుకున్నాను.

బాలరామాయణంతో ఆరంభించినా

చేతులారంగ శివుని పూజింపడేని అనిపించింది.

మరోసారి ఓడిపోయాను.

పెద్ల బాలశిక్షతో  తెలుగు బాట పట్టాను.

నవనవలాడే నవవర్షప్రాయంలో

ఇదే జీవితం కాదనుకున్నా

ఓడిపోయి మరోచోటకి పారిపోయా

ఆంగ్లం మోజు తలపుల బూజులు దులిపింది

ఆరేళ్ళు యధాలాపంగా సాగిపోయింది.

కళాశాలలు పట్టభద్రత ఆకర్షించాయి

అందుకే ఇంట ఓడిపోయి ఆవంక చేరిపోయా.

నూనూగు మీసాలతో నిరుద్యోగం పోటీ పడింది

ఉత్తమం స్వార్జితం విత్తం అనిపించింది

అందుకే ఓడిపోయి ఒంటరి పయనం ఆరంభించా

భూమి గుండ్రంగా ఉందని తెలిసింది

తెలుగు పలుకు తియ్యదనం రారమ్మంది

పద్యాలు పాటలే బ్రతుకనుకున్నా.

అక్కడా ఓడిపోయా.

ఉద్యోగం పురుషలక్షణం అనగా విన్నా

రాజధాని నగరం చేరుకున్నా, అన్నీ బాగానే ఉన్నా

ఒంటరి బ్రతుకు చేతిలో ఓడిపోయా.

జంటగా మరో అంకం ఆరంభించా

సంసార రంగులరాట్నంలో గిఱ్ఱున తిరిగా

అధికారం అంచులపై ఓడిపోయా

ఆరుపదులవయసుకు విశ్రాంతి అవసరమన్నారు.

చేతులారంగ శివుని పూజింపడేని అనుకున్నా

ఎంతో ఓపిగ్గా దేవులాడుతున్నా

పరమాత్మ చేతిలో ఓడిపోవాలనుకున్నా

ఆ ఆఖరి ఓటమి కోసం ఎదురుచూస్తున్నా.