అవును
 నాన్న గొంతు మూగబోయింది
అమ్మే యింకా కాస్త నయం
ఆరుపదుల వయసు దాటాక
సంతానం సంపాదనలో పడ్డాక
సంసార భారం తరం మారాక
నిజంగానే
నాన్నగొంతు మూగబోయింది
అమ్మే యింకా కాస్త నయం
ఇప్పుడు
 నాన్నవన్నీ ఛాదస్తపు మాటలే
నాన్నకివేమీ మింగుడు పడవులే
పంచమి నాడు మంచిదన్నా తప్పే
మంచము మీద బువ్వ తినరాదన్నా తప్పే
ఉదయాస్తమాన సంధ్యా పూజలు తప్పే
హృదయాంతరంగ నామస్మరణా తప్పే
ఎందుకో
నాన్నగొంతు మూగబోయింది
అమ్మే ఇంకా కాస్త నయం
ఏదైనా కోరి తిందామన్నా తప్పే
ఎందుకులే నాకొద్దు అన్నా తప్పే
అలా కాలక్షేపానికి తిరిగొస్తానన్నా తప్పే
ఇంట్లోనే పడి ఉంటానన్నా తప్పే
మద్యాహ్నం నడుం వాల్చనన్నా తప్పే
రాతిరి పెందలాడే పడుక్కున్నా తప్పే
తెల్లవారకముందే నిద్ర లేచినా తప్పే
అందుకే
నాన్న గొంతు మూగబోయింది
అమ్మే ఇంకా కాస్త నయం