తికమకలో బ్రతికేనా

మరణానికి భయపడి బ్రతుకుతున్నానా?
సాధించవలసింది చాలా ఉందని బ్రతికేనా?
మరణాన్ని ఆస్వాదించడం ఆహ్వానించడం
తెలియని తికమకలో బ్రతికేస్తున్నానా?ఏమో!
బ్రతకడంలో ధర్మం గాని మరణంలో మర్మం గాని
నా మెదడుకు అవగతం కాని చిదంబర రహస్యాలు
అందుకే ఏ లక్ష్యం లేకుండా నిర్లక్ష్యంగా
గగనాన్నీ గగనచర గమనాన్నీ గమనిస్తూ
కాఱుమొయిలు కార్పణ్యాన్నీ చిరు జల్లుల సొబగునీ
చండ ప్రచండ భానుణ్ణీ శరద్జ్యోస్నా నిషధ్వరినీ
ప్రళయ భీకర సమీరాలను పిల్ల తెమ్మెరలను
జీవరూప రహిత రుజా రాక్షసాలను భిషగ్వరులనూ
చూస్తూ నిమిత్తానిచ పశ్యామి యని తలపోస్తూ
అనునిత్యం ఛస్తూ చావలేక బ్రతికేస్తూ
ఇదిగో యింకా మాటల తూటాలు పేలుస్తూ
నాకంటూ ఓ అస్తిత్వం నిలుపుకోవడం కోసం
ముగించడం రాని కథకుడిలా నిషాధుడిలా
చరిస్తున్నా వేదాలు వేదనలు నన్ను నడిపిస్తున్నా
మరణానికి భయపడి నే బ్రతుకు తున్నానా?
సాధించ వలసింది ఏమైనా ఉందని మిగిలేనా?