సీ.
కడగంటి చూపైన కడుపావ నమ్మంటి
       ముక్కంటి వాల్గంటి మ్రోల నంటి
కలకంఠి! కష్టాలు కనమంటి వినమంటి
     ఆమంత్రణమొకటె యడుగు చుంటి
నిన్నంటి నీ మంత్ర నియతితో శ్రీ యంత్ర
     మంటి నిల్చుంటి నోమంటి యుంటి
పూవింటి కరమంటి పొడగంటి  లేరంటి
             నీవంటి వేల్పు మన్నించ మంటి
తే.గీ.
మంచు కొండలపట్టి మమ్మంటిపట్టి
కామితార్థము లిచ్చి నన్ గావమంటి
నా మనవి వినమంటి  యానందవల్లి
కంచి కామాక్షి కరుణించు కల్పవల్లి. 35

సీ.
ప్రతిజీవికీ యుండు ప్రాణ భయమ్మంచు   
  బ్రతుకంగ వెరతురే ప్రజలు భువిని
ఊపిరాడు వఱకు యుండును నాదను
      వాదమే వేదమై వరలు చుండు
కోటి విద్యలు కూటికొఱకను యెఱుకచే
       కుక్షింభరిత్వాన కుములు చుండు
సంసార సాగర సాహసపు సరంగు
     తానగుచు నగుచు తవులు చుండు
తే.గీ.
ధ్యాస నింకేడ నీపైన తాల్చ గలడు
రూక పై ధ్యాసతో ప్రతీ రోజు గడువ
ఆ పయనమెట్లు సాగు నానందవల్లి
కంచి కామాక్షి కరుణించు కల్పవల్లి.37

సీ.
 మరణమే  శరణమా  మాతృమూర్తీ నీదు
      చరణ యు గళమేల శరణు నీదు
ధన మాన నష్టముల్ తప్పవా నీ యుపా
     సనలకు ఫలితమా సాధు హృదయ
యుపకార బుద్ధియే యుండిన చాలునే
     ధన మవసరము కా దందువా కా
మేశ్వరీ మందిలో మేముండ గల్గంగ
     విలువ నిమ్ము కొదువ వీడనిమ్ము
తే.గీ.
నందు కాత్యాయనీ! కరుణాంతరంగ!
కామితార్థము లిచ్చి నన్ గావుమమ్మ
నమ్ముకొంటినే నిన్ను యానందవల్లి
కంచి కామాక్షి కరుణించు కల్పవల్లి. 38