సీ.
మనిషికెన్ని వెతలు మనికికెన్ని కతలు
      నీమీద మనసుల నిలుపుటెట్లు
దినదిన గండాలు దీర్ఘాయు రన్నట్లు
      బ్రతుకు సమరమున వరలు టెట్లు
ఆపదల నడుమ ఆశల వెనుకగా
     మెలగుటే కాని నే మిగులు టెట్లు
నెమ్మది కరవయి నిమ్మళించని మది
    నిష్కామ కర్మలు నెఱపుటెట్లు
తే.గీ.
పూట గడచిన చాలు సంపూర్ణ మతిని
మాట పడకుండ బ్రతికెడు మనికి చాలు
నన్ను మన్నించవమ్మ యానందవల్లి
కంచి కామాక్షి కరుణించు కల్పవల్లి.41
సీ.
చీటికీ మాటికీ చీకాకు పరచుచూ
      విసిగించ లేను నే విసివి పోను
ఆలనా పాలనా అమ్మ! నీవే యంచు
      అనునిత్యమూ నమ్ము ఆర్భకుడను
ఆదుకో చేదుకో ఆర్యా మహాదేవి!
      నిన్ను నమ్మిన వాడ నిరతమేను
అన్నెమూ పున్నెమూ యసలేమి ఎఱుగను
       అందర్ని నమ్మేటి అధముడేను
తే.గీ.
ఆదు కోవమ్మ అభయంపు హస్తమొసగి
చేదు కోవమ్మ గోముగా చేరదీసి
నన్ను మన్నించవమ్మ యానందవల్లి
కంచి కామాక్షి కరుణించు కల్పవల్లి.42
సీ.
రారాతి దుహిత కిరాత దయిత విశ్వ
   వపుష కరుగునా యావంత మనసు
రేరేని సిగబంతి రిత్త జేసిన యింతి
   చల్లని వెన్నెలల్ జల్ల గలవె
దాదాపు నీ ప్రాపు దక్కునననుకొంటె
    దాక్షాయణీ దయ దలుప వేల
జేజేల సరములన్ చిద్రూపి కడనుంచి
     చిత్త చాంచల్యమున్ చిదుమ వేల
తే.గీ.
శివ కుటుంబిని జాగేల చింత దీర్ప
శం కరివరదా భయమీయ శంకలేల
నామనవి వినవేల యానందవల్లి
కంచి కామాక్షి కరుణించు కల్పవల్లి.43