అమ్మా నీ కళ్ళలోకి చూస్తూ
నెలల బిడ్డగా వెన్నెల చూస్తూ
అఆ..ఇఈ.ఉఊ..అంటూ నవ్వా
అమ్మా అంటూ తొలి మాటను. పలికా //   //
నీ ఒడిలో ఆదమరచి నిదరోయా
ఆ ఒరవడిలో కళ్ళతోనె ఊసాడా
నీవే సర్వస్వంగా తలపోసా
నీ కొంగు పట్టుకుని తిరిగా
నీ గోరుముద్దలే అమృతంగా
నీ జోల పాటలే కర్ణామృతంగా
పెరిగానమ్మా ఇదిగో ఇలా ఉన్నానమ్మా //   //
బడికి పంపినపుడు వెక్కివెక్కి ఏడ్చానే
కాలేజీకి పంపలేనపుడూ ఏడ్చానే
ఉపాధి కోసం వలసబాటలో ఏడ్చా
ఉన్నంతలో తీర్థ యాత్రలెన్నో చేయించా
మూడు ముళ్ళు వేసాకే నిన్ను కాస్త మరిచా//   //
మాయ రోగం నీ కొచ్చినపుడు
నిన్నంటి పెట్టుకు నిలిచానే
ఋణం తీరిపోయే క్షణం
ఎందుకో దూరమైపోయానే
నీవిచ్చిన సంపదే నా నోటి తెలుగు
నువు నేర్పిన ప్రణతే నా భగవత్సేవ
అందుకే అమ్మా నీకు వందనం
అమ్మా నీకిదే సాష్టాంగ ప్రణామం.//   //