దేవదేవా!
కష్టాల కొలిమిలో నా మనసు కాలిపోనీ
దుఃఖాల జలధిలో నా బ్రతుకు కలసిపోనీ
సమ్మెట పోటులను తప్పెట గుళ్ళుగా భావిస్తా
కర్మక్షయం అనుకుంటూ సరిపెట్టుకుంటా
ధర్మ విజయంగా గుర్తిస్తూ సరిపోల్చుకుంటా
నాహంకర్తా హరిః కర్తా అని తలమున్కలౌతా
అంతా ఆ ఈశ్వరేచ్ఛగా అవలోకిస్తా
కాకుంటే కాదనకుంటే నాదొకటే వినుతి
అన్నిటినీ భరించే సహించే బలమివ్వు
అన్నిటినీ అధిగమించే అవకాశమివ్వు
శివోహమ్మనే నమ్మికతో గరళమైనా మింగేస్తా
త్వమేవాహం అంటావని ఎన్నటికీ ఎదురుచూస్తా
తెలిసినదొకటే సర్వం అనసూయార్పణమని
తె‌లియనిదొకటే పరహితమ్మనే సంకల్ప మేలని
సర్వసంగ పరిత్యాగిలా సన్యసించాలా
గృహమేథిగా నీ దయకు పాత్రుడ గాలేనా
యోగక్షేమం వహామ్యహం అన్న నీ భరోసాతో
సంయోగ వియోగాలను ఒకేలా తీసుకో గలనా
సంకల్పం నీది ప్రయత్నం నాదిగా దేవదేవా
ఈ దేహ దేవాలయంలో నిత్య యజనం సాగనీ
నన్ను నీలో పరిభ్రమించనీ రమించనీ విశ్రమించనీ.