శ్రీ చక్రము ---- కోటిలింగాల రేవు
   'విద్యానాం కాది రుత్తమం' అని ఆర్యోక్తి.
కాది విద్య అంటే 'క' తో ఆరంభమైన మంత్ర విద్య'.
అదే శ్రీ విద్య. అందులో 'హ' ఆదివిద్య మరో రూపాంతరం.
సృష్టి ఆరంభం ఒక అణువిచ్ఛేదన వలన జరిగిందని  Big bang theory వంటివి ప్రతిపాదించాయి. సనాతన ధర్మం ప్రకారం విరాట్ పురుషుని ఒక సంకల్పం ఈ సృష్టికి మూలం. అందులో మొట్టమొదట ధ్వనించినది ప్రణవనాదం. ఆ ప్రణవమే జగన్మాత. ఆ తరువాత త్రిమూర్తులు. ఇలా లోకాలు ఏర్పడ్డాయి .
ఆ జగన్మాతకు రేఖా రూపమే శ్రీ చక్రం.
దైవోపాసనలన్నింటిలో మహోన్నతమైనది శ్రీ చక్రోపాసన లేదా శ్రీ వద్యా సాధన.
ఆ శ్రీ చక్రం భూమండలానికి ఈ కోటిలింగాల రేవులో నే అమ్మవారు ప్రసాదించారట.
ఆ కథ చూద్దాం.
భండాసురుడనే రాక్ష సంహారం కోసం శ్రీ దేవిని ఉద్దేశించి దేవేంద్రుడు ఒక మహాయజ్ఞం చేసాట్ట. ఆ యజ్ఞంలో దేవతలు తమ శరీరము లోని మాంసమునే హవిస్సుగా సమర్పించారట. వారి త్యాగానికి సంతోషించిన శ్రీ దేవి కోటి సూర్య సమప్రభగాను కోటి చంద్ర శీతల మయూఖములతో హోమాగ్ని మధ్యన ప్రత్యక్షమై శ్రీ చక్ర మధ్యస్థగా సాక్షాత్కరించింది.
అందుకే ఆమె 'చిదగ్ని కుండ సంభూతా దేవకార్య సముద్యతా' అయింది.
ఈ యజ్ఞము గోదావరీ తీరాన కోటిలింగ క్షేత్రమున జరిగెను. అచ్చటనే శ్రీ చక్రముతో ఆవిర్భవించుటచే ఆ ప్రదేశము రాజరాజేశ్వరీ మందిరమై రాజమహేంద్రవరముగా విలసిల్లెను.
(శ్రీ చక్ర విలసనం....
శ్రీ తుమ్మలపల్లి రామలింగేశ్వర రావు విరచితం పుట 16.ఆధారంగా)