పగటికల

దినకరుడే కరుణిస్తే
జలధరమే అడ్డొస్తే
మండే ఎండలు మటుమాయం
ఎండే గొంతుల కుపశమనం
చెమటోడ్చే శ్రమజీవుల కానందం
ఉడుకుల దుడుకులకో విరామం
ఇంతలో
వరుణుడు కరుణిస్తే
తొలకరి చివురిస్తే
వాన జల్లు కురిపిస్తే
మనసు జిల్లు మంటుంది
కాని
శిశిరంలోనే గ్రీష్మం చొరబడితే
శిబిరంలోనే ప్రచారం స్థిరబడితే
ఎన్నిక లెట్లా సాగేను
ఏలిక లెట్లా గెలిచేను
ఓటు పండుగ అంతా
ఓటి మాటగ అయిపోదా
మరేంచేద్దాం
దిల్లీ పెద్దని అడిగొద్దాం
పగలే చంద్రుని రప్పిద్దాం
వెలిగే సూర్యుని మూసేద్దాం
భూమినే ఆ పక్కకు నెట్టేయమందాం
శీతానుకూలమై
వాతానుకూలమై
చూడ ముచ్చటగ
కలువలు పూయిద్దాం
కమలం పోతే పోనిద్దాం.