మా దేశం
శర వేగంతో ఎదుగుతోంది
శీఘ్ర గమనంతో పయనిస్తోంది
బానిసత్వ వారసత్వనుంచి
ఊడిగాల పడిగాపుల నుంచి
నవత యువత భవిత త్రికరణములై
మా దేశం
లఘువులేస్తూ దూసుకు పోతోంది
గురువు తానై యోగమిస్తోంది
నిస్త్రాణ నైరాశ్యాల అగాథాల నుంచి
విదేశీ వ్యామోహ స్వదేశీ నిర్మోహాల నుంచి
వడివడిగా జడివానలా
నిస్సవ్వడిగా జవ్వనిలా
మా దేశం
ప్రపంచాన్ని ఆకర్షిస్తోంది
ప్రతి దేశాన్ని చెలిమికి పిలుస్తోంది
మా దేశం మారుతోంది
మార్పు మా రక్తంలో ఉంది
నేర్పు మా మస్తిష్కంలో ఉంది
ఓర్పు మా నరనరాలలో ఉంది
చేర్పులూ కూర్పులూ మామూలే
మీ...మీ....
తీర్పులూ మామూలే
ఔత్సాహికులు వేగంగాను
బద్ధకస్తులు నిమ్మళంగానూ
నిరుపేదలు నిరాక్షేపణీయంగాను
ధనికులు అహంకారం తోనూ
చిరునవ్వులు చిందిస్తూ
మా దేశం మారుతోంది.