మొక్కలు నాటుదాం

దినకరుని ఆగ్రహానికి అల్లాడినా
వరుణకరుణకు భువి ఆనందించినా
అది ఆ దివ్య శక్తులకు మనపైన ఉన్న
అవ్యాజాను రాగాల దయార్ద్రతల కన్న
ఒకరిది హెచ్చరిక మరొకరిది కనికరం
వెరసి మృగశిర కన్నా ముందే వాన చినుకులు
ఉష్ణ తాపం నుంచి ఉపసమనం
ఉక్క పోతల నుంచి విముక్తి
ఎంత చెప్పినా ఎంత చేసినా
బుద్ధి రాదు యీ మనుషులకు
విజయవాడ బెంజ్ వలయం లో
ఈడొచ్చిన మొక్కలన్నీ నఱికేసారట
అసలే అది మరో అగ్నిగోళం
శ్వాస ఆడక పోయినా ఫరవాలేదేమో
తరలింపులూ మరలా నాటింపులూ
ఊసేలేదు అటు పాలకులకు ఇటు పాలితులకూ
ప్రతి వారికీ పెంపుడు జంతువులాగ
ఒక పెంపుడు మొక్క పెంచుకోవాలి
పశుపక్ష్యాదులకు మేత మనకు శ్వాస
భూదేవికి ఆకు పచ్చని పట్టు చీర
తక్కువలో తక్కువగా మహాటవి కాకున్నా
పది మొక్కలు ప్రతి ఒక్కరూ నాటుదాం
ఉన్నంతలో దినకరుని అనుగ్రహం పొందుదాం.