నిరీక్షణ

నీ కమనీయ కనుకొలకులలో

ఒక వేడి కన్నీటి బిందువై చారికనై

నేలరాలి పోతా ఈ మట్టిలో కలిసి పోతా

నీ యోషా నాసా పుటాలనుండి

ఒక దీర్ఘ నిట్టూర్పునై నిగిడి

నీ గుండెలు తాకుతా గాలిలో కలిసి పోతా

కింకర్తవ్యతా విమూఢత్వంతో

నీ కుడికాలి బొటన వ్రేలితో 

నేలపై గీసే అరసున్న నేనౌతా కడదేరి పోతా

నీ ఎడమ చేతి చూపుడు వేలికి

యిథమిథ్థమంచెరుక లేక

చుట్టుకొనే చీరకొంగు నౌతా వసివాడి పోతా

ఊహల కందని దూరాల పై 

అయోమయంగా చూసే చూపునై
అశృనయనాలుగా మిగిలిపోతా కనలి పోతా

మునిపంటితో నొక్కిన అధరాధర క్షతమునై

ఎరుపెక్కిన వాతెరనై అల్లాడిపోతా

ఒకరికి ఒకరుగా మనసారా

మాటాడుకునే సందర్భం కోసం

ఎన్నాళ్ళైనా నిరీక్షిస్తా పరీక్షిస్తా.