ఊహల వల్లరి
'నేను నాది' అనే ఒంటరి తలపు మానుకుందాం
ఒకరి కొకరుగా 'మనం' అంటూ మనగలుగుదాం
ఇచ్చిపుచ్చుకుంటూ ఇరుగు పొరుగౌదాం
పంచుకుంటూ ఉన్నదాన్ని పెంచుకుందాం
ఈవి లో ఉన్న హాయి ఇంకెక్కడా లేదని
ఇప్పటికైనా తెలిసి మసలు కుందాం
పొరపొచ్చాలు లేని ప్రాణ స్నేహితులౌదాం
కలిసి మెలిసి కడదాకా సాగుదాం
కలల నయాగరాలను నిజం చేసి చూపుదాం
ఊరి వారి కళ్ళన్నీ ఉసురు పోసుకోవాలి
ఊరించిన ఊహలన్నీ కట్టెదుట కదలాలి
ఆత్మీయంగా మనసారా పలుకరించుకోవాలి
ఒకరికొకరు భరోసాగా పులకించి పోవాలి
నమ్మకమే పునాదిగా ఎత్తులు ఎదగాలి
నవ్విపోదురు గాక నాకేటి వెరపని నిలవాలి
నవ్విన నాప చేను పండిందని చూపాలి
పదిమందికీ ఇకపై కనువిప్పు కావాలి

దేవదేవుని క్రీగంటి చూపులో పునీతులం కావాలి.