పండుగంటే

పండుగంటే పదిమందీ కలుసుకోవడం
ఆనందాలూ అనుభవాలు పంచుకోడం
అనుబంధాలు సంబంధాలు పెంచుకోడం
ఆత్మీయంగా ఆప్యాయంగా పలుకరించుకోడం
పండుగంటే ప్రకృతితో పరవశించి పోవడం
పొలం గట్టుమీద కాలువ గట్టుమీద బాతాఖానీ
వరి కుప్పల వద్ద బడి సావడి వద్ద గత స్మృతులు
నెమరు వేసుకుంటూ నెనరు చాటుకుంటూ
చిరకాలపు నవయవ్వన పరిచయాలు
చిననాటి చిరునవ్వుల సంగడీలు
పునరేకం మమేకం కావడం
అరిటాకులో భోజనాలు పేకాటలో లబోదిబోలు
అత్త వారింటిలో అరిసెల భక్షణాల ఘుమఘుమలు
ఎడాది పొడుగునా ఊరించి  వచ్చిన పెద్ద పండుగ
ముక్కనుమతో మూటా ముళ్ళూ సద్దుకోమంటుంది
అమ్మాయీ పిల్లలూ ఆదివారం వస్తారు
తొందరైతే మీరే వెళ్ళండి అల్లుడు గారంటూ అత్తగారు
కాదనకు బాబూ మరో రెండు రోజులే కదా అనే మావగారు
కదల లేక వదల లేక కాదన లేక ఒంటరిగా వెళ్ళలేక
బిక్కమొహంతో బయలు దేరే జామాతల వెతలు
కిక్కిరిసిన బస్సులలో రైలు బళ్ళలో కార్లలో ప్రయాణాలు
నగరాలు  పరుగుల బ్రతుకుల ఒరవడికి నగారాలు
మరోమారు సమయం లేదు మిత్రమా అంటూ
అంతే. అంతటితో పండుగ వేడి చల్లబడి పోతుంది
పల్లె పిల్ల మూగబోతుంది పల్లెపట్టు బోసి పోతుంది
కాల గమనంలో మరో చంక్రమణం పూర్తవుతుంది.