ఎదుర్కోలు

అనంత హేమంత సీమంత వధూటి
చేమంతి పూబంతి విరితోపుల వసుంధర
శీత సమీర పులకిత లజ్జా ప్రతీక
సువర్ణ చ్ఛాయా ధాన్య విస్తార పుడమి
దహనహితకర సుమనస్సంసేవ్యమాన
కుసుమవతి మేదినీ హేమంత వధూటి
క్రాంతి పథనిర్దేశ్య సంక్రాంతి వేళ
పౌష్య లక్ష్మిగ పౌరులందరి పలుకరించు
ధాన్య రాశుల తోడ తా ధాన్య లక్ష్మి గ
పల్లెపల్లెన పల్లకీ లెక్కి ఊరేగు
రంగురంగుల రంగవల్లుల రంజిల్లు రాజ్ఞి
హరిదాసుల గంగిరెద్దుల సాక్షిగా
మన యింటి మొగసాల మనల మన్నించి
నిలచి దీవించు నా హేమంత వధూటి
ఆమెయే మన యింటి పౌష్య లక్ష్మి
ఆ రాకకై ఆమెకై హారతులు పట్టి
ఎదురేగి ఎదసాగి స్వాగతిద్దాం
నేటి రేపో రేపు మాపో ఆవల నాటికో
ఆమె ఆగమనం కోసం ఎదురు చూద్దాం.