సత్య శోధన (కథ)

"రావే యీశ్వరి కావవే వరద సంరక్షించు భద్రాత్మికే"
మెల్లగా వినిపిస్తోంది మేష్టారి గొంతు.
నెమ్మదిగా అడుగులో అడుగు వేసుకుంటూ "పూలకు గుండెలుండవని పోకిరులెవ్వరు చెప్పిరట్లు" అంటూ వినిపించింది సత్య.
మేష్టారు పూదోటలో ప్రతి మొక్కకూ స్వయంగా పాడి తవ్వి నీరుపోస్తారు. అన్ని మొక్కలనీ తన చేతులతో నిమురుతారు. ఆయన వాదనల్లోదే పూలకు గుండెలుండవా అని అన్న మాట.
ఆ మాట వినగానే సత్యా!  ఇదుగో ఇక్కడ సంపెంగ మొక్క దగ్గర. ఇటురా"
"వెదుకంగా నేల యీ యా యెడన్" అలాగేనండీ.
" నమస్తే మాష్టారు. మద్యాహ్నం రెండు గంటలకి వచ్చాను ఊర్నుంచి".
"మంచిదమ్మా. బాగా చదువుతున్నావా?" "అన్నీ సక్రమంగా నడుస్తున్నాయా?"
"అవును మాష్టారు."
"ఏమిటి విశేషం? ఏమైనా సందేహాలా?"
"కొంతమంది కేట్ కి తయారవుతున్నారు. నేను ఎటూ నిర్ణయించుకోలేక మీ సలహా కోసం వచ్చాను."
"సరేరా ఆ సిమెంటు బల్లమీద కూర్చుని మాటాడుకుందాం."
మేష్టారి స్కూల్లో ఎక్కువ మంది ఆడపిల్లలే చదువుతారు. ఆయన ఒక ఆశయంతో బడి పెట్టారు. చురుకైన పిల్లలను బాగా చేరదీసి మరింత చురుగ్గా తయారు చేయడం పెద్ద చదువులకు పంపించడం అవుసరం అయితే ఫీజులు కూడా ఆయనే కట్టడం చేస్తారు. ప్రతి సంవత్సరం ఒకరికైనా ఐఐటి సీటు వచ్చేలాగ తీర్చిదిద్దుతారు. ఇంటరు విశాఖలో ఏదో కాలేజీలో చేర్పించినా అన్నీ స్వయంగా చూసుకుంటారు. ఆ వరుసలో సత్య ఐదవ అమ్మాయి. తను ఆర్.ఇ.సి. ట్రిచీలో బి.టెక్ మూడో సంవత్సరం చదువుతోంది.
"ఏంటి నీ సంశయం?'
"ఎం.బి.ఏ చేయాలా వద్దా?అని"
"నీకు నిజంగా సోషల్ సర్వీస్ చేయాలి అని ఉంటే సివిల్స్ రాయడం మంచిది. కాని అక్కడ బాధ్యత చాలా ఎక్కువ. సమయం సరిపోదు. ఏ క్షణంలో అయినా విధి నిర్వహణకు సిద్ధంగా ఉండాలి."
"ఎం.బి.ఏ. చేస్తే మంచి ఉద్యోగం  వస్తుంది. కానీ సాంఘిక సేవకు అవకాశం ఉండదు."

"ధనమూల మిదం జగత్"

"డబ్బు లేకుండా సేవ ఎలా చేయగలం మేష్టారు?"

ఐ.ఏ.ఎస్. అయితే ప్రభుత్వం ఎన్నోరకాల పథకాలను పేదలకు అందిస్తుంది. దానికి జిల్లా కలెక్టర్లదే ప్రధాన బాధ్యత.

"అర్హులైన ప్రజలకు అందించి ఆశించిన ఫలితాలు రాబట్టడం కర్తవ్యం."

"సొమ్ము ప్రభుత్వానిదీ సేవ మనది."

" సరేకాని అది చాలా కష్టమైన పరీక్ష అంటారు. మరి నేను సాధించగలనా?"

"ప్రయత్నం మానవ లక్షణం. కృషితో నాస్తి దుర్భిక్షం."

"కృషి ఉంటే మనుషులు ఋషులౌతారు."

" నిజమే మేష్టారు. దానికి ఎలా ప్రిపేర్ కావాలో చెప్పండి. కొడితే సిక్సే కొట్టాలి అని అదే చేస్తాను."

" మంచిదమ్మా! ప్రస్తుతానికి బి.టెక్ మీద దృష్టి పెట్టు. కేంపస్ ప్లేస్ మెంట్స్ లో మంచిది సాధించు. ఓ రెండేళ్ళు ఉద్యోగం చేసాక అయితే సివిల్స్ కి తయారు కావచ్చు."

"మీ ఆశీస్సులే నాకు దిశానిర్దేశం. యథా యోగ్యం తథా కురు."   

          *  *  *  *  *

" నమస్తే మేష్టారు. టి.సి.ఎస్ లో  ఆర్టిఫిషియల్ ఇంటెలిజెన్స్ లో క్రియేటివ్ డిజైనింగ్ ఇంజనీర్ గా సెలెక్ట్ అయ్యాను. 23 లక్షల పేకేజి సార్."

" చాలా సంతోషం సత్యా! మొదటినెల జీతం రాగానే అమ్మకీ నాన్నకీ బట్టలు కొను. అమ్మ చేతులో ఆ డబ్బులు పెట్టు. ఆమె కళ్ళల్లో ఆనందం చూడు. అది వెల కట్టలేనిది."

"తీరిక సమయాల్లో కరెంట్ ఎఫైర్స్ ఆఫ్ ఇండియా చదువుతూ ఉండు."

"అలాగే మేష్టారు."

తెలుగులో శ్రీ శ్రీ, దేవులపల్లి, విశ్వనాథ వంటి వారి రచనలు చదువుతూ ఉండు.