పాలింపవే భార్గవీ.

మ.
ఉపవాసంబులు జేయుచున్నుభయ సంధ్యోపాసనల్ జేయుచున్
యపవాదంబులు లేని మార్గమున ధర్మాధిక్య చిత్తంబుతో
విపరీతంబుగ మంత్ర తంత్రముల శ్రీ విద్యాను రక్తిన్ మనో
చపలత్వంబులు మాని నిత్య యజనా చాతుర్య భక్తుండనై.

ఉపలబ్దంబగు లేశమున్ శత శతంబుల్గానె భావించుచున్
కపటంబొల్లక కల్లబొల్లి కథలన్ కాదంచు నే నమ్మితిన్
సుపథంబియ్యది యంచెఱింగి త్వదుపాస్యోద్ధతిన్ సాగుచున్
యపకారంబుల జేయనొల్లని మదిన్నాకాంక్ష పోదేలనో.

మరణంబొక్కటె సర్వ క్లేశ హరమా? మార్గాంతరంబుండదే
శరణంచున్ ననుగావుమంచు మమ వాచాలత్వమున్ జూపుచున్
చరణద్వంద్వము నంటి వేడితిని విశ్వాసంబుతో కావవే
పరులా నమ్మిన వారి విశ్వ వపుషా!పాలింపవే భార్గవీ.

నిను సేవించిన పున్నెమో కడకు నన్నీరీతిగా నిల్పగా
మును నే జేసిన పాపమో యితరమో మోమాటమో
యప్పులన్
నను ముంచెత్తిన పాఠశాలకిక నైనా మోక్షమిప్పించవే
యనుకూలించవె భార్గవీ దయలు నాయందున్ జూపింపవే.

కరుణించాలని నీకు లేనపుడు నాకాధార మేముంటమిన్
మరణించాలను నిశ్చయమ్మొకటి సమ్మానంగా కన్పడన్
ధరణీ బంధము వీడిపోవుటలు సంధర్భోచితమ్మందు నే
సరిపోజాలనె నీ కృపాబ్ది మునుగన్ సంతోషమే యంతమున్.