సర్వే జనాః సుఖినో భవంతు!
ఊబిలో దున్నలా గిజగిజ లాడుతోంది లోకం
కంటికి కనిపించని కరోనాతో కుస్తీ పడుతూ లేస్తూ
కుడితిలో పడ్డ ఎలుకలా విలవిల లాడుతోంది ప్రపంచం
వైద్య కోవిదులకే అంతుపట్టని కోవిద్ పంతొమ్మిదితో
దేశదేశాల ఆర్థిక రథం యిరుసును విరిచిన కరోనా
లక్షల కొద్దీ మరణాలు వాడవాడలా హాహాకారాలు
అంతు చిక్కని అంటురోగం అగమ్యగోచరం మార్గాంతరం
ఆకాశంలో కనిపించీ కనిపించని అరుంధతీ నక్షత్రంలా
మిణుకు మిణుకు మంటూ ఏదో తెలియని ఓ ఆశ
త్వరలో విరుగుడు మందు రాకుండా పోతుందా అని
ఏన్నాళ్ళకు మరలా మునుపటి జన జీవనగమనం
మరలా ఎన్నాళ్ళకు ఉరుకుల పరుగుల జీవితం
ఇంకా ఎన్నాళ్ళకు అందరికీ చేతినిండా పని దొరికేనో
కంటిమొయ్యా నిద్ర కడుపు నిండా బువ్వా కలిగేనో
మరో నవోదయం మరో నవజీవన సూర్యోదయం
త్వరలోనే ఆవిష్కృత మౌతుందని కోటి ఆశలతో
ముక్కోటి దేవతలకూ ప్రణుతి జేస్తూ ప్రణతులిడుతూ
వేడుకుందాం జీవకోటి శ్రేయస్సును కోరుకుందాం
సర్వే జనాః సుజనో భవంతు సుఖినో చ భవంతు.