ఉషోదయం

    ఉషోదయం

వినువీథులలో స్వేచ్ఛా విహంగమై
మిన్ సరోవరములో వరలు రాయంచనై
కనుకొలకులలో జాలువారు ఆనందబిందువై
 నడిసంద్రపు అలజడిలో ఉత్తుంగ తరంగమై
విహరించాలనీ నడయాడాలనీ
ఎన్నెన్నో అత్యాశలు ఏవేవో తీరని కలలు
ఒంటరి మనసుకు ఆనందాన్నీ ఆహ్లాదాన్నీ
పంచి యిచ్చే మరీచికలూ నీహారికలు
వ్యతిరేక పవనాల వాకిలిలో
వ్యసనాల కవనాల లోగిలిలో
క్రొక్కారు వూహలే క్రొంజివురు ఆశలే
నిషద్వరీ పరిష్వంగంలో నవోదయం
నిరంతర నిస్పృహావేశాలలో ఉషోదయం.