ఒక జీవితకాలపు వాంఛ
ఓడిన  ప్రతిసారీ  ప్రతీకారేచ్ఛ
జీవితంలో ఒకసారైనా
ఏడుకొండలవాని వేడుకోవాలనీ
సుప్రభాత సేవలో మైమరచి పోవాలనీ
అమ్మ ఆశీర్వదించింది
రమారమణుడు రమ్మన్నాడు
ఇదిగో నే బయలుదేరుతున్నా
నడిచి నీ కొండ లెక్కుతా
నీ దివ్య మంగళ మూర్తిని
తనివితీరా జూచి ఉప్పొంగిపోతా
చిన్నప్పుడు నోరారా పాడుకున్నా
నీ సుప్రభాతమూ మంగళారతీ
ఇన్నాళ్ళకు మన్నించావా మలయప్ప స్వామీ
ఆదుకో చేదుకో అంతే కాని ఆడుకోమాకు
అన్నమయ్యను కాను పదకవితలతో పొగడ
పోతన్నను కాను మందార మకరందాలు జల్ల
మాది వట్టి రాళ్ళపల్లి, రాళ్ళలో మొలచిన
వట్టి గడ్డిబరక నా కవిత నీకు విన సొంపౌనా
పవిత్ర మార్గళిలో నీ సుప్రభాత సేవ
నన్ను మరింత భాగవతుణ్ణి చేయాలి
తతిమ్మా అన్నీ ఆ ఈశ్వరేచ్ఛ ఆపై నా ప్రారబ్దం.