పంచుకో పెంచుకో

అభిమానించే మనసంటూ ఒకటుంటే
అభివందనం మనసా పాదాభి వందనం
అనుసరించే మనసంటూ ఒకటుంటే
అనుస్మరణం అదొక  చిరస్మరణీయం
కళ్ళలోకి సూటిగా చూస్తే తలపు తెలిస్తే
ఆ అనుభూతికి మరో పేరు మమకారం
గుండె లోతుల్లోంచి ఉప్పొంగిన చిరునవ్వు
బండ రాతి గుండెను కరిగించే మొలకనవ్వు
ఆత్మీయతా భావానికి చిరునామా అవును
తల్లి కళ్ళలోకి బిడ్డ ఆర్తిగా ఎలా చూస్తుందో
భగవంతుని కళ్ళలోకి ఆశగా అలా చూస్తుంటే
అదో అనిర్వచనీయ అద్వితీయ వరప్రసాదం
ఆ సమయంలో విరబూసిన అసామాన్య మౌనం
బ్రతుకు వెలార్చడానికి కావలసినంత భరోసా
మనసు నిండా ఏదో మాటలకందని కులాసా
సజ్జనులతో నీ గురువుతో నీ తలిదండ్రులతో
అటువంటి అనుభూతులు పంచుకో పెంచుకో.