సీ.
శ్రీ లలితా పరా భట్టారికా శివ
పర్యంక శ్రీ విద్య పర్యుపాస్య
నిత్య సంధ్యోపాసనా ర్చనా జపతప
నిష్ఠలే అనువంశ నిధులు మాకు
ఉపనిషద్వైదిక శాస్త్ర పురాణేతి
హాసములవి ప్రతిహార్యములగు
మంత్రముల్ యంత్రములు సవన తంత్రముల్
కరత లా మలకమగు కలిమి మాకు
తే.గీ.
జాతక ముహూర్త గణనమ్ము జాను విద్య
తెనుగు నూనూగు యందాల తేనె లొలుకు
అల్లిక జిగిబిగి పల్కుమా కాట పట్టు
మువ్వురమ్మల యమ్మ మమ్ముద్ధరింప.
సీ.
జిహ్వ చాపల్యంబు జివురు వెట్టదు మాకు
స్వగృహ భోజ్యముల్ వరము మాకు
ఇంద్రియ నిగ్రహంబు మనో నియతి మాకు
ఈశ్వరేచ్ఛ బహు ఈప్సితము మాకు
జపములే ఉచ్ఛ్వాశ నిశ్వాస ములు మాకు
తెనుగు పలుకులవ్వి తీపి మాకు
పరసుఖా నందమే పరమావధియు మాకు
పరహిత మె హితమై పరగు మాకు
తే.గీ.
నిత్య నైమిత్తి కానుష్టా నేచ్ఛ తోడ
సర్వ కార్య నియతి కాగ నిరతి మాకు
గురువు లుపదేశ మిచ్చిన గురుతర విధి
శ్రీ, మహా విద్య లత్యంత శోభ మాకు.
0 Comments:
Post a Comment
Subscribe to Post Comments [Atom]
<< Home