ఓ రోజు

ప్రతి ప్రభాతం ఓ సుప్రభాతం
ప్రతి ఉషోదయం ఓ నవోదయం
చల్లని గాలితో తెల్లని వెలుగుతో
తొలి ప్రొద్దు నా కైతే ఎంతో ముద్దు
ప్రాచీ వీచికలూ మనో మరీచికలూ
పోటాపోటీగా ఉరకలు వేసే సమయం
అరుణోదయపూర్వ చిరు సమయం
పక్షుల కిలకిలా రావాలు పసికూనల రాగాలు
సుప్త సుషుప్తి లోంచి చేతనావస్థకు బదిలీ
సకల ప్రాణి కోటికీ జీవన పోరాట ఆరాటం
నిస్స్వార్థ సేవలో నిమిష మైనా విలంబన
దరిజేరనీయని తామస హరు ఆలోచన
మది అలజడి కనలేవా
ఎద సవ్వడి వినలేవా
అంటూ వసుంధర ఆవేదన
దరిచేర్చమంటూ సిరి మల్లె నివేదన
ఆపై ఏముంది
ఉరకలూ పరుగులూ
ఈర్ష్యలూ అసూయలూ
కక్షలూ కార్పణ్యాలూ
ఆవేశాలూ ఆవేదనలూ
ప్రొద్దు గూకే దాకా అదేతంతు
తిలా పాపం తలో వంతు
తిమిర సన్నాహంలో
గూటికి చేరే పక్షులు
కూటికి కనుకుకూ
ఆరాటపడే మనుజులు
దుప్పటీ ముసుగులో
కామ వికారాలు
ఇదేనా జీవితం? ఇదే  నా జీవితం
ఇంతేనా ఫలితం?