ఒప్పుకుంటావా తప్పు కుంటావా 

కలలలో కలసినా
కనులలో మెదలినా
ఎదురుగా నిలచినా
ఎడదలో మిగిలినా
అది నీకే సాథ్యం
పలువరుస కననీని మందహాసం
అంపాగ్రమౌ ఆ నిటారు కనుచూపు
గుండె లోతుల్లో గాయపెట్టే  ఆ తూపు
నిలువునా నన్ను కట్టి పడేసే
గారుడ తంత్రం.
ఎకాఎకీ నా పైనే చుర కత్తులు విసిరే వైనం
ససేమిరా నామాటే వినకూడదనే నీ నైజం
పనికి మాలిన వాటిపై
వల్లమాలిన మోహం
తలపుల తటిల్లతల
నదిమి పెట్టని మంకుతనం
అవి నీకే చెల్లు.
ఏకాంతంగా కూర్చుని
నిదానంగా ప్రశాంతంగా
ఆలోచించి విలోకించితే
నీ అంతరాత్మ నిన్ను
నిలదీసి కసితీ‌రా
అక్షింతలు వేసాకైనా
తప్పు నాదికాదు నీదే అని
ఒప్పుకుంటావా
అప్పుడు కూడా
దూరంగా తప్పుకుంటావా.