చెంగల్వ పూదండ

ఉ.
అమ్మను కొల్చుచుంటిని సకాముడ నౌచు నకాముడౌచు నే
నిమ్మడిగా యిదిమ్ము అది యిమ్మని కోరని కోర్కెలేదు మా
యమ్మ తనేమి యిచ్చినను అన్నుల మిన్నుగ నుండు యందుకే
యమ్మను నమ్ముచుంటి ననయమ్ము నయమ్ము భయమ్ము మీరగన్
అమ్మ యనంత శక్తి సులభమ్ముగ నర్థము కాదు కాని తన్
నమ్మిన వారి బాగు ఓగులకు నేరుగ బాధ్యత తానె స్వీకరిం
చిమ్ముగ భక్తులందరకు చక్కని చిక్కని కొంగు బంగరౌ
అమ్మకు నాదు గుండెలలొ దేవళ మొక్కటి కట్టినాను బ
లమ్ముగ శబ్ద శైలముల లాక్షణికాకృతులన్ మషీ సుపం
కమ్మున మేళవించి రసికత్వ సుశోభితమౌ నటుల్ విలా
సమ్ముగ నుండ నే నుపవసించుచు నుండెద నెల్లవేళలం
దమ్మకు నా సమర్పితము తృప్తి నొసంగిన చాలు వాదనల్
కమ్మని వేదనల్ ముసురు కొన్నవి ఉన్నవి చాలు చాల్ విశే
షమ్ముగ శేష జీవితము షోడసి నూపిరిగా గమింప జేయగా
అమ్మకు విన్నవించితిని స్వస్థత కూరుకు లిచ్చి చేతిలో
సొమ్ముల లేమిలేక విన సొంపగు పద్యపు కల్మి బల్మి తో
నెమ్మది నిచ్చి నన్ను కడతేర్చ మటంచును వేడుకొంటి రా
రమ్మని కాలకింకరలు రజ్జవు లొక్కెడ తీయు నంతకున్.