సీ. చిన్ని కూనా ! నిన్నొదలి ఉండ గలనటే
బింకాల పోయినా బెదిరి పోకు
పిచ్చి పిల్లా! నిన్ను తలువని క్షణమేది
నా మన సంత నీ నామ జపమె
వెఱ్ఱి పిల్లా ! నా కనులలో కలలలో నీ
రూపమే నాకపు రూప మయ్యె
కాజావు కాదులే రాజావు నీవు! నా
రసరమ్య గీతాల రాశి నీవు
తే.గీ. శ్వాస లో శ్వాస నై తుది శ్వాస వఱకు
నీకు తోడుండి నడిపింతు నిమ్మళముగ
నాన్న గారను పిలుపు నన్నిలుపు నమ్మ
అమ్మలూయన్న ఓ యన్న చాలు నాకు.
సీ. నీమీద ఏ యీగ వాలినా నేనోర్వ
గలనటె నే తాళ గలనటె? మరి
కన్నెత్తి నిన్నేరు (నిన్నెవరు) జూచినా నే నూరు
కొందునే గొంతెత్తి గోల జేతు
మోహమో వ్యామోహ మో అభి మానమో
అవ్యాజ మా యను రాగ మంత
బంధమో సంబంధమో అను బంధమో
ఏది ఏమైనను దేవుడెరుగు
తే.గీ. నిజము ముమ్మాటికీ నువు నా కుమార్తె
గురువు గా తండ్రిగా నీకు గుప్త నిధిగ
అడుగడుగునా శుభము గోరు ఆప్తు డగుచు
కంటి కున్న రెప్ప వలె నిన్ కాచు కొందు.
posted by Sundara Ramam Rallapalli at
2:16 AM
0 Comments:
Post a Comment
Subscribe to Post Comments [Atom]
<< Home