సీ.
*ఎంతటి భాగ్యమొ విరులక దెంతటి
            సౌభాగ్యమో గదే చంపకమ! మిము
నంతనె వేలుపు లైనను యెంతగ
            నిష్ట పడుదురొ యిదేమి ఫలమొ
*భగవంతునిదరి జేరగ నగునే మము
            బోంట్లకు తమకగు పువ్వు లార
సిగబంతిగ ధరియింపరె మగువలు మిము
            మరువిల్లగుట వరమదియు గనరె
తే.గీ.
*పూలిక విరబూయాలని బోలెడు తమి
తో లలనలు పూ దురుమక  దూరములను
నిలువ యజితు చరణముల నిలుప దలతు
ఓల మింకేల సుమి మనకొద్దు తగవు.


కం.
ఎంతటి భాగ్యమొ విరులక
దెంతటి సౌభాగ్యమో గదే చంపకమా
అంతనె వేలుప లైనను
యెంతగ నిష్టపడుదురొ యిదేమి ఫలమ్మో. 1.
కం.
భగవంతుని దరి జేరగ
నగునే మము బోంట్లకు తమకగు పూలారా
సిగబంతిగ ధరి యింపరె
మగువలు మరువిల్లగు వరమదియున్  గనరే. 2.
కం.
పూలిక విరబూయాలని
బోలెడు తమితో లలనలు పూ దురుమక దూ
రాలను నిలువ యజితు చర
ణాల నిలుప దలతు ఓల మింకేల సుమీ. 3.
( అజితుడు = జయింప బడని వాడు / భగవంతుడు  ఓలము = దాపరికము)
గమనిక: పై సీస పద్యం లో * గుర్తు దగ్గర నుంచి చూస్తే కంద పద్యాలు వస్తాయి.)