ఏది నందన వనం?

చల్లని శరత్ చంద్రికలలో
హేమంతపు హిమ సమీరాలలో
ఆరు బయట పిల్లా పాపా ఆటా పాటా
వేకువనే ఉహుహూ అంటూ చలిమంటలు
వరువాతనే కృత్తికా స్నానాలు
ఏటి పాయలో కార్తీక దీపాలు
అదంతా గతం నాకంతా మనోగతం
కార్తీక సోమవారం ఉపవాసం
తారా దర్శనం తరువాతే భోజనం
ఉదయం నుంచి తినకుండా దాచినవి
వెన్నెల వెలుగులో బాతాఖానీలో ఖాళీ
అర్థ శతాబ్దం వెనుక చవి చూసాం కనుక
ఇంకా నెమరుకు వస్తుంటాయి పాత జ్ఞాపకాలు
ఇప్పుడదంతా గతం నాకదంతా మనోగతం
నగర జీవనంలో వెన్నెల వెలుగులూ
చక్కని చలిలో సరదాలూ సంబరాలూ
అన్నీ కనుమరుగే అన్నీ పరగడుపే
గది నాలుగు గోడల మధ్య నేనో బందీ
ఊరటగా సాయం సమయం నడకా
సార విహీన జీవన గమనం
కొందరికిదే నందన వనం.