నాహం కర్తా

ఆశకు అంతేమిటి
అవకాశాలకు లోటేమిటి
దృష్టి పెడితే ధ్యాస కుదిరితే
ఆశయాలూ అంతిమ లక్ష్యాలూ
ఏదైనాఎంత దుష్కరమైనదైనా సాధ్యమే
ఎత్తు పల్లాలు అవాంతరాలు
ఎన్ని ఎదురైనా ఏటి కెదురీదినా
సంకల్ప బలం దైవ బలం తోడుంటే
మిన్ను నిన్ను కాదనదు
మన్ను నిన్ను వలదనదు
గమనం నీది గమనిక పై వానిది
సమరం నీది సమయం పై వానిది
కదలిక నీది అమరిక పై వానిది
సాధన నీది దీవెన పై వానిది
ఆచరణ నీది ఆదరణ పై వానిది
ప్రతి కదలిక ప్రతి మెదలిక
అంతా ఆ ఈశ్వరేచ్ఛ
అంతా ఆ విశ్వ విభు ఆజ్ఞ
అందుకే
'నాహం కర్తా హరిః కర్తా'.