ఆశ పడతా పాటు పడతా

ఎదిరించడం బెదిరించడం నా అభిమతం కాదు
మంచితనం ఈ మౌనం  నా అశక్తతలూ కావు
వివేకంతో ఆలోచించి ఆచి తూచి మాటాడే
నా ప్రతి మాట నా మనసు మూల్గుల తూటాలే
ఎద పరచి స్వాగతిస్తా సద్విమర్శ నేదైనా
ఆత్మావలోకనం తో నన్ను నేను సరి చేసుకుంటా
నా పై విసిరే విసిగింతలూ వెక్కిరింతలూ
నవజీవన హోమంలో పేలి పోయే పేలాలు
శాంతం మౌనం సహనం ముప్పిరి గొన్న వైనం
నా అంతరంగం నా భాధాతప్త మనో గతం
కాలం దైవం సమవర్తులై నన్ను చేరదీయాలి
సమిధను కాలేను అహంకార యజ్ఞానికి
శలభం కాలేను దురహంకార అగ్నికి
ప్రజ్ఞానం విజ్ఞానం తోడూ నీడగా
అడుగు లోన అడుగు వేస్తూ పయనిస్తా
ఆసాంతం శాంతంగా ఆలోచిస్తా
దైవం నన్ను సన్మార్గంలో నడి పించాలనీ
ఆశయాలూ అవకాశాలూ అంది పుచ్చు కోవాలనీ

ఆశ పడతా పాటు పడతా.