ధర్మం దారి తప్పింది

చలాకీ కుఱ్ఱాణ్ణి అమాయకపు అమ్మాయికి కట్టబెట్టారు
పెద్దలంతా కలసి అరవై శరత్పూర్ణిమల ముందు
అరవై ఏళ్ళలో గడుగ్గాయి చేతిలో రాటుదేలింది
నవ నాగరికం వంట పట్టించుకుని ఆ ఆమాయకపు పిల్ల
కన్నుకుట్టుకున్న కాలువ కుంటోడు పచ్చని కాపురంలో నిప్పు రాజేసాడు
గడుగ్గాయి కాసులన్నీ అత్తారింట ఒలకబోసాడు
అయిన వాళ్ళూ కానివాళ్ళూ కళ్ళు కుట్టుకున్నారు
చాడీలు కైతికాలూ ఆమె చెవిలో గర్జింపించారు
బిఱ్ఱ బిగుసకు పోయింది ఆ అక్కు పక్షి
పాలకులు విడిపొమ్మన్నారు నిర్దయగా ఆ జోడీని
అంతిస్తాం ఇంతిస్తాం అన్నారు అడిగిన వన్నీ ఇస్తామన్నారు
అధికార ప్రతిపక్షాలు రెండూ కుమ్మక్కై విడగొట్టారు
అత్తారింట ఒలకబోసినదంతా అమాయకంగా నటిస్తూ ఎగరేసుకు పోయింది ఆ కొంటె పిల్ల
ఇస్తానన్న హామీలకు అతీ గతీ లేదు
హోదాలమాట పరదా వెనక్కి దాటేసారు నమోజీ
పిల్లిగెడ్డం గోక్కోవడం తప్ప ఏమీ చేయలేని మా బాబు
దిల్లీలో ప్రతిదానికీ బాబ్బాబు అంటూ బతిమాలుకుంటాడు
ముప్పైఏళ్ళు నేనే ఉంటా ఆ పదవిలో అంటాడు పులి విందుల కూన
పెద్దలు వాగ్దానాలను తుంగలో తొక్కారు
కమ్మ కాపు వెలమ దళిత నాయకులు ఎవరైనా ఒరిగేదేంటి పోయేదేంటి
తిరుమల కొండమీద శిలువ రాకుంటే చాలు
గోదావరి గట్టుమీద  నీటి పాయ కనబడితే చాలు
కృష్ణమ్మ ముక్కుమీద నీటిచుక్క ముత్తెంలా మెరిస్తే చాలు
తుంగభద్రలో వేసవిలో కూడా నీరుంటే చాలు
కనుచూపు మేరలో మందు కొట్ట కనబడకుంటే చాలు
ఆకాసం శాంతించి దయదలచి దీవిస్తే చాలు
కాయకష్ఠం చేసుకుంటూ నిశ్చింతగా నిదురోతే చాలు
పిల్లలు గుంభనంగా నిమ్మళంగా పై చదువుల కెళితే చాలు
ఆరుగాలం కష్ట పడతాం అవాంతరలను అధిగమిస్తాం
పోటీ పరీక్ష లన్నిటిలో మేమే ముందు వరుసలో నిలుస్తాం
పదేళ్ళు గడిచాక మీరంతా చతికల బడతారు
మేమైతే వందేళ్ళు హాయిగా ఠీవిగా బ్రతికేస్తాం.